政Whats噏：疫情記者會明起改網上舉行議員：令人質疑滅聲 - on.cc東網
新冠肺炎疫情自去年初爆發至今，政府長期以嚟都會喺下午舉行疫情記者會，交代疫情嘅最新發展。政府今(3日)宣布，話記者會由聽日開始轉用網上舉行，仲唔接受傳媒用語音提問，只能用文字。疫情持續1年，依家先嚟轉用網上形式，仲要唔接受記者用語言提問，唔通政府想滅聲？有議員直斥做法唔合理同埋太遲，令人覺得係迴避傳媒。
喺爆發疫情無耐，衞生署同醫院管理局就召開疫情記者會，幾乎日日都見到衞生防護中心傳染病處主任張竹君同醫管局嘅代表向傳媒交代疫情嘅最新情況，但政府今日話疫情記者會聽日改為網上舉行，傳媒代表要喺記者會開始前1個鐘內透過電郵登記報名，衞生署就會喺記者會開始前15分鐘先用電郵確認登記同埋提供記者會詳情。唔單止咁，傳媒機構亦只能派1個代表參與，仲要只能用文字訊息提問，唔可以用語音，若果問題有重複嘅話，會以綜合回應嘅方式處理。
衞生署其後再解釋，話係應對疫情嘅主要政府部門，喺疫情爆發以來，一直積極研究同安排以視像會議軟件喺網上舉行簡報會，又話喺逐步解決各項硬件同軟件等技術問題，並參考其他政府部門同埋機構嘅相關經驗，署方喺完成添置相關器材同協調工作後，由聽日起喺網上舉行簡報會。
身兼立法會衞生事務委員會主席嘅議員葛珮帆直斥政府做得太遲同極不理想，認為防疫抗疫至今都有1年，學校都早已用視像會議軟件上堂，亦曾同政府同視像會議軟件開會，如果政府覺得可以嘅話，應該早啲使用，唔使等傳媒走嚟走去。
葛珮帆仲認為記者會應該以方便傳媒為先，指立法會用視像會議軟件都可以向政府發問，依家限制傳媒只能用文字提問，或會令人質疑想禁傳媒聲音，對報道疫情消息冇好處之餘，形象亦都唔好，認為政府應該要再三考慮。對於以綜合回應方式處理，葛認為做法唔合理，傳媒追問係因為覺得政府回應唔對題，依家令人覺得係迴避傳媒。
政府嘅抗疫措施一直為人詬病，依家連舉行記者會都搞個大頭佛出嚟，作為食物及衞生局局長嘅陳肇始唔止要檢討，係咪應該要問責呢？
2021-01-03 13:30:00Z
https://news.google.com/__i/rss/rd/articles/CBMiU2h0dHBzOi8vaGsub24uY2MvaGsvYmtuL2NudC9uZXdzLzIwMjEwMTAzL2Jrbi0yMDIxMDEwMzE4MzMzODg3Mi0wMTAzXzAwODIyXzAwMS5odG1s0gEA?oc=5
52782627772587 香港
Bagikan Berita Ini
0 Response to "政Whats噏：疫情記者會明起改網上舉行議員：令人質疑滅聲 - on.cc東網"
Post a Comment