【對香港有愛】黎智英自嘲唔守規律得罪人林夕希望市民延續第四權 - 香港蘋果日報
壹傳媒創辦人黎智英與詞神林夕今日在《蘋果》「果燃台」隔空深情對談，履行不改的約定，兩人更接受讀者提問，剖白外界關心、或平日甚少機會問到的問題，當講及最重要的家人時，黎智英更在鏡頭前落下男兒淚，真情流露。有觀眾提到習近平與林鄭，林夕就以捲脷口音，呼籲要釋放自己。
黎：黎智英 夕：林夕
讀者鍾小姐：林鄭月娥每日都被人鬧到不得了，我想睇吓你哋兩個有咩說話會祝福佢？
黎：祝福佢……我覺得係可憐佢，唔係祝福佢囉，一個人做到今日佢咁嘅地步，我唔相信佢係會快樂嘅，佢呢生人去到下半世會變成一個咁樣嘅人，係好悲哀囉！真係好同情佢。
夕：我喺台灣《蘋果日報》連續寫過兩篇，總共3,000幾字嘅叫做《林鄭的前世今生》，其實就係講佢哋成長過程、性格、成長背景，影響到佢今日嘅命運，咁如果你話有咩祝福……我唔會用祝福嘅，我亦都唔想咒詛，我真係好憎咒詛，因為咒詛會令你變成你自己好討厭嘅人，但對於林鄭，我其實呢兩日寫咗我對佢嘅悲憫，我分析佢就係因為冇生活、冇嗜好，所以佢就更加沉淪入權力螺旋嗰度，以致到好慘囉，我會同佢講：「今日，你真係有實權咩？你自己知啦，你（將）剩餘嘅權力要嚟報復香港人嘅心態，何必呢？放過自己去睇精神科心理醫生啦，我仍然相信佢係一個天主教徒嚟，我驚佢有DID（編按：多重人格障礙，後改名為解離性身分疾患 Dissociative Identity Disorder，DID），每個人都有少少，但我驚佢嚴重到係心理嘅防衛機制逃避咗自己。因為真係有人影相影到佢一個人好寂寞咁喺教會度，佢其實無需要扮呢樣嘢。
黎：佢痛苦㗎，佢而家走肉行屍㗎。
夕：我覺得好似滅絕師太咁，滅絕師太嘅收場真係唔係幾好……
讀者Eunice：假若你哋兩位都有機會見到林約希（林鄭次子），唔知你哋會想問佢或同佢講啲咩呢？
黎：我覺得我唔會同佢講啲乜嘢，因為佢媽媽做嘅嘢係佢媽媽嘅事，唔好將個細路仔放埋喺佢媽媽嘅黑影裏面，我覺得細路仔係唔應該喺呢件事裏面係受到損害。
夕：我覺得如果你對佢講呢句說話，對佢都係一個好大嘅心靈安慰，我相信佢自己本身都懂。我如果見到佢……我同佢好熟咩我？（笑）我都會係廿扛唔多，每一個人喺世上都係一個獨立嘅生命，自己有自己嘅。
黎：而且佢對佢媽媽係冇選擇。
讀者Mary：黎生你成日被其他傳媒抹黑，話你勾結外國勢力、喜歡捏造新聞，有冇諗過行出嚟澄清，或者用其他方法去解決呢個問題？
黎：我一生人都係非常之爭議嘅一個人，無論我係做毛衫嘅時候，做佐丹奴，到今日我做傳媒、我都係喺個行業上好唔守規矩嘅一個人，好多時因為唔守規矩、出位而得罪咗好多人。對我嚟講，我係控制唔到，因為我係好鍾意創新嘅人，我係唔鍾意守舊嘅人嚟，變咗好多時創新、我做嘅嘢會得罪咗人，好多人無論抹黑好、無論係因為我嘅做法而損害佢哋，（令佢哋）有個理由去攻擊我都好，呢個我完全接受嘅，但係我永遠唔解釋，因為如果我做嘅嘢我自己相信嘅，我唔使解釋，正如我對兒女，我好少同佢哋講道理，我覺得身教係最緊要。我覺得做人唔使咁緊張人哋點樣睇你，最緊張係你點樣睇自己，如果你真係對自己有信心、係做緊啲啱嘅嘢，有時你會誤解，但唔會維持好耐，但如果你真心、真係去面對自己，你好快知道自己做錯嘢，我都成日檢討自己。就算做生意都係，最緊要係對自己嘅檢討，明知錯都做，咁人哋話你啱都冇用，心裏面個壓力都喺度，你心裏面個付出都喺度，我覺得呢個好緊要。
讀者Louise：（問黎生）日前警方拘捕你兩個仔，其實你兩個仔都好少曝光，你之後有冇同佢哋傾過萬一第二時再被捕會點樣做？
黎：因為我哋一個家庭係互相承擔責任，我哋係好close嘅，當然當我知道我兩個仔被拉咗，我係好震驚，但同時我亦唔會覺得對唔住我個仔，因為我同我啲仔係好close，我覺得我哋嘅命運係一齊，所以如果係發生喺佢哋身上，我知佢哋唔會怪我，我亦唔會內疚，因為從來我哋嘅命運係一齊嘅。
讀者陳小姐：如果CCP（中國共產黨）真係攞你屋企人做人質要脅你，一定要你stop，你會唔會放棄《蘋果》呢？
黎：呢個係我唔想諗嘅問題，（開始哽咽）我唔會諗呢個問題，呢個係（夕：一日的憂愁，一日擔心就夠了）我最難面對嘅問題，我覺得家庭對我最重要，唔係我嘅事業或名譽，我會將家庭放喺我嘅事業同名譽上面，但係如果有呢啲嘢發生，我都唔知點樣面對，我唔會知道點樣面對……
夕：未發生嘅事如果去憂慮，係冇意思嘅話，不如先放低個憂慮先。
黎：我唔去諗佢囉，我覺得佢哋唔會做到離譜到咁，即係將我嘅家庭作為人質，如果佢哋做到咁離譜，我真係唔知點面對，我真真正正唔知樣面對……
夕：我覺得物極必反啦，如果做到咁離譜，世界自然會有反作用，佢哋自己亦都會自己承擔返呢個代價，而且個代價將會好大，香港可能因此而得救。
讀者Didio：（問黎生）你講過擔心自己被送中，如果真係的話，你有乜嘢放唔低？
黎：冇嘢放唔低，去咗我就唔諗㗎喇，如果真係送咗中就唔諗，我就將自己交付畀上帝，接受咗自己嘅命運，等如接受咗上帝嘅祝福。
讀者Carman：有乜嘢令你哋堅持到有今日？同埋你哋覺得見到啲乜嘢先至係達成使命？
夕：唉，好低要求㗎咋，香港變返做一個合理文明嘅社會就夠，有時（目標）太高，令自己好大壓力，而且老實講，我都係得支筆啫。當初我嚟台灣，當初唔係因為咩政治因素，毫無呢個考慮，我只係真心喜歡台灣嘅生活環境，同埋想試吓兩地生活嘅對比。後尾好明白，我知道邊度係唔適合我去做貢獻，成為人哋嘅拖累，我喺台灣，每次遊行都搞出事，中暑就病3日，既然係咁，我喺台灣可以放心地任意做可貢獻嘅嘢，就係用支筆同用個腦，亦都唔會停。
黎：我會堅持，真係冇諗到堅呢樣嘢，我只係成日覺得your life is not about yourself，人生唔係因為你而喺呢個世界，而係為咗自己以外、比你大好多嘅嘢活着。（讀：幾時有呢個感悟？）我自己能夠真係感悟到、講得出嚟，唔係話好早就有，但我個感覺係咁，你會有個直覺你一生人唔係為自己活着，呢個感覺一路喺度，點樣將佢去領悟到，我諗唔係好耐之前嘅事，可能都係呢10年、8年嘅事，但我一路都覺得，我唔係為自己而活着。
讀者Mary：喺國安法之下，我哋點樣可以繼續維護新聞自由，作為讀者，有乜嘢方法可以幫到手撐黃色世界（黃色經濟圈）？
夕：守衞新聞自由，好多方法，唔好淨係講《蘋果》先，我哋每個人都要有一個自己，當自己係記者（嘅諗法），尤其係而家呢個年代，咁嘅時候你都會係新聞界嘅一部份，你都係第四權嘅一份子，你 可以監察傳媒、監察政府。點樣守護香港嘅新聞自由就係，唔好喺一啲小地方覺得我唔講或忍受咗佢就算，我認為再長氣都要反映出嚟，因為捍衞新聞自由有一點好重要係，唔好咁容易認為已存在嘅事物或事情就係合理，唔係囉，只要大家是非黑白觀念比較清晰嘅時候，唔會咁容易對於一啲常態或習慣，我成日都講「人類最懷嘅習慣就係習慣」，唔好咁易習慣，呢個係守衛新聞自由好緊要，因為你習慣咗好多嘢，就好容易被人洗腦。
黎：林夕講得啱，你作為一個讀者或巿民都好，我哋要真係維持到新聞自由，唯一能夠做嘅係分清楚是非黑白，我哋就支持咗新聞自由。
夕：補充一點，即使係《蘋果日報》，有時有啲標題係煽情得嚟冇必要，我哋都唔怕批評，唔會因為我支持《蘋果》就覺得係合理。等如《大公報》如果被人搜被人查，我仍然會出嚟聲討，唔係因為我鍾唔鍾意佢嘅問題，呢點好緊要。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：
2020-08-16 15:56:15Z
https://news.google.com/__i/rss/rd/articles/CBMiTGh0dHBzOi8vaGsuYXBwbGVkYWlseS5jb20vZW50ZXJ0YWlubWVudC8yMDIwMDgxNi9EQ1RUUUtLWEpaQU9GRUFNNDU2WTNHUU5CTS_SAQA?oc=5
CBMiTGh0dHBzOi8vaGsuYXBwbGVkYWlseS5jb20vZW50ZXJ0YWlubWVudC8yMDIwMDgxNi9EQ1RUUUtLWEpaQU9GRUFNNDU2WTNHUU5CTS_SAQA 香港
Bagikan Berita Ini
0 Response to "【對香港有愛】黎智英自嘲唔守規律得罪人林夕希望市民延續第四權 - 香港蘋果日報"
Post a Comment